(Tala Fa’a Salevalasi Atua. Ole tasi nei o taofi)

Timalesa le Ulua’i Sitagata o Lotofaga ma le mafua’aga ole toga a le Malietoa lauta’amutafea(1700AD)

Gafa o Fiame Muagututi’a le Sa’ofa’apito i Lotofaga Atua:
Usu #2 Tuiavi’i ia Leteleotalaia le afafine o Mata’afa i Ululoloa faaee le gafa o Taua’aletoa (tama), ma Unusialetoa (teine: tau le gafa ia Manalelei Talaleomalie).
Usu #4 Taua’aletoa ia Falenaoti le afafine o Tauilili i Amaile, faaee le gafa o Tago (tama), Tupuola (tama), ma Pafuti (teine).
Usu Tupuola ia Lifuti le afafine o Loai i Lotofaga, faaee le gafa o Seinafolava (tama).
Usu Seinafolava ia Taufagalupe le afafine o Leilua i Sagone, faaee le gafa o Samatau’a Siolosega (tama).
Usu Samatau’a Siolosega ia Sivaenae le alo o Po’elaga i Lepa, fa’aee le gafa: o Fiame Ufi’avaopupu (tama: Ole Ulua’i Fiame), ma Taufau (teine).
Usu Fiame Ufi’avaopupu ia Levalasi le alo o Tapu o Letaupe i Mata’tufu, fa’aee le gafa: o Tuiatua (tama matua: O le Alii o Aiga), ma Muagututi’a (tama: o Muagututi’a lea na soso’o ile suafa Fiame o Lotofaga Atua mai i lona tama o Fiame Ufi’avaopupu).
Usu Fiame Muagututi’a le Sa’ofaapito ia Masu le alo o SITAGATA TIMALESA i Lotofaga, fa’aee le gafa: o Leaegalesolo (tama), Fuiava’iliili (tama), Va’asa (teine), ma Va’aloa (teine) – (Ole fanau to’afa lenei o lo’o fa’alupe nei i Lotofaga o “Alo-tau-tino ole Sa’ofa’apito ua Fiame”. Ole to’afa lenei e filifili po’o ai so latou suli e nofoia le suafa Fiame pe’a avanoa).

Na ta’oto le fa’atafa o le Ulua’i Tupu Tafa’ífa o Salamasina ile Malae o Mulifusi i Matafagatele(1500AD), lea ua ta’uá nei o Lotofaga i aso nei. Na to’ái le toma’ága a Manalelei Talaleomalie ia Tupuola Folopapa i Tanumaleu(1600AD), a’o le’i maua lava le Malae ua ta’úa o Lotofaga i aso nei. Ona o’ó mai lea ile taimi o Fiame Muagututi’á o ia lea fa’áto’a maua ai le Malae, Maota o Fiame Muagututi’á o Lotofaga Atua(1700AD). Ole Malae ole fa’autugatagi. Ona usu ai lea o Fiame Muagututi’á ia Masu le alo o Timalesa o Lotofaga. Ua finagalo nei Fiame Muagututi’á ua tatau ona iai sona va’á. Ona malaga ai lea o TIMALESA i Savai’i e sa’ili se la’áu e ta ai le va’á o Fiame Muagatutiá e pei ona finagalo iai le Sa’ófa’apito. Ua alu le malaga a Timalesa ma si ana fanau ole tama ma le teine. Ua taunu’ú atu i Sapapali’i Savai’i, o malomaloa le gasegase o Malietoa Fitisemanu ile Malae. Ona fa’amalumalu atu lea ole Malietoa e Timalesa ile lauta’ámu sa ia fa’amalu ai ile la. Ona anau atu lea ile Malietoa ma fa’amalie atu iai Timalesa, ia malie lana susuga ua vevela le la. Ona malie ai lea ole Malietoa, ma ua tata’i atu i lona Maota lava i Sapapali’i. Ua i lona Maota le ali’i, ona tu’útu’úloa lea ole malaga a Timalesa ma si ana fanau. Ua taunu’ú le malaga a Timalesa ma lana fanau i A’ópo ona fa’aáfe ai lea ole malaga ona ua vevela le la, ona afe ai lea o le malaga. Ua tu’ú atu nei eTimalesa le lauta’ámu i le teine e taofi atu, e toe fa’aáoga pe’a tu’úa A’ópo. Ole masani ma aga a Samoa a afea le nu’ú i se malaga, ona fai lea ole ava usu. Ua fa’alalolalo mai nei le pa’ia ile ala’alafaga ole faleselau ile malaga, ona o lo latou ala’álafaga ua gaumati ua le maua se vai e palu ai le ava ole feiloa’iga. Ona vala’áu atu lea o Timalesa i lona alo teine o iai le lauta’ámu e va’ái le ao oi sasa’e e ta’álo ile lauta’ámu, ia timu ia maua ai se vai e fai ai le ava. Ona to lea ole timu ma ua maua ai le vai e palu ai le ava usu i A’ópo, maua ai lea ma le fa’aupuga e fa’apea: “UA TALI I LAGI VAI I A’OPO”.

Ua alu pea le malaga ma ua fa’ato’a tu’úa A’ópo ona lafoa’i lea e le teine o le lauta’ámu ile sami, ae alu pea le malaga ua iloa atu Sasina le afio’aga o Leali’ifano ua fa’amoemoe iai le malaga. Ua fesili atu le Malietoa i lona afio’aga o potopoto, po’ó i fea si tagata lea na fa’amalumalu atu ia te ia i le lauta’ámu. Ae o ai fo’i le igoa? Ua tali atu le afio’aga ua le maua le igoa o si tagata ma si ana fanau o si tama ma si teine. Ona auiga atu lea e Malietoa o ana faleupolu e tuliloa le tamaloa, ma fa’amalie iai ia fo’i mai le malaga ona e le’i faia iai ni fa’aáloaloga e taui ai lona agalelei ia te ia. Ona o ai lea o faleupolu e tatalo ia Timalesa ina ia fo’i mai le malaga i Sapapali’i. E taunuú atu i A’ópo tulafale ua le maua atu le malaga i A’ópo. Ua alu pea le sa’iliga o Timalesa e faleupolu, ae va’áia loa le lauta’ámu o tafeafea mai ile sami. Ua felafolafo ai faleupolu i o la manatu, pe ole a lea mea nei ua tafeafea mai ile sami. Ua tasi nei io la manatu o le a fo’i mai ma le lauta’ámu e aumai i lo la ali’i. Ua taunu’ú mai faleupolu ma fa’amalie atu i lo latou ali’i le Malietoa, ua le maua atu le tamaloa ma lana fanau. Ae ua na ole lauta’ámu lea na fa’amalumalu ai le Malietoa e le tamaloa. Ua silasila atu le Malietoa Fiti-se-manu ile lauta’ámu ona soisoi lea o le ali’i ma fa’apea lana tala. Ua maua le igoa o la’u toga, ole “LAUTA’AMUTAFEA” ona ua e fa’atafea mai le lauta’ámu na ou malu ai ile la. Ae o lou suafa lea SI-TAGATA ma lau fanau o SI-TAMA ma SI-TEINE. O Suafa ia o lo’ó i Lotofaga Atua e o’o mai ile aso.

Ua taunu’ú i Sasina ona fa’ailoa lea e Timalesa le fa’amoemoe ua sau ai le malaga i lona afio’aga, ua talia lelei e Leali’ifano le fa’amoemoe ma ua ta le va’á. Ua uma le va’á ma ua sauni mo Lotofaga Atua i Upolu. OLE ULUA’I SITAGATA LENEI I LOTOFAGA, SITAGATA TIMALESA. Ole va’á lenei na auva’á mai Lotofaga e pusi ma pusi, ae malolo Sitagata Timalesa, Sitama ma Siteine ua taulau le fa’amoemoe ua mae’a le va’á o lo latou ali’i le Sa’ófa’apito o Fiame Muagututi’á. O pusi na auva’á maia le va’á o Fiame Muagututi’á o le NOFOILO, ole tasi pusi e uliuli, a’o le tasi e pa’epa’e (sina), o le tasi e ena’ena.

E le moni le mau lea e fa’apea mai o le ulua’i Fiame i Lotofaga o Fiame Ufui’avaopupu ona o mafua’ága nei: O le ulua’i Fiame o Ufuiavaopupu o le tuagane lea o Taufau, ae le’i maua le Malae o Lotofaga. Ole Malae o Lotofaga fa’ato’a maua ia Fiame Muagututi’á na si’í e Matatufu i lalo i Matafagatele, o le ala lea ua ali’i ta’i ai ia Fiame ma Sa’ofa’apito iai. O Ulua’i Sa’ó sa ala’ála i Tanumaleu, o Tupuola ma Seinafolava. O lo la fa’alagina e fa’apea: Afio mai e na ulua’i sa’ó Tupuola ma Seinafolava, Afio mai le fale agafulu o Fiame, Afio mai le falevalu o Seinafolava, Afio mai fa’aulu’ulu Teoteo ma Tumanuvao, Afio mai le ali’i ole ao le tupe na tago’esea Amituana’i, Maliu mai ali’imau o faleupolu Fa’atili ma Lemauga, Susu mai Sitagata ma le va’á na taumualasi ma le aiga Sasitagata, mamalu mai le faleatua.

Fa’atolotologa Tama Tausala(1600AD)

Usu Muliagasoifanua ia Ifi le afafine o Luatua i Sale’imoa, fa’aee le gafa: o La’ulunofovaleane, ma La’ululefano. Usu La’ulunofovaleane ia Pouliotaua le afafine o Tu’u i Safune, fa’aee le gafa: o Maupenei (teine). Usuia Maupenei e le Tui-Toga, fa’aee le gafa: o Aumoana. Usu Le Aumoana ia Fuiailelagi le afafine o Salima i Papa-Fagali’i, fa’aee le gafa: o Tau’iliili i Papa (tama).

O Le Tau’iliili i Papa lea sa tu lona Malo i le Papa i Galagala ma lona Ituau malosi ma le faiga lea sana faia ia Malietoa, ina ua fo’i mai le malaga a Malietoa mai le motu, ona alu lea o le toa o le Malo o Tau’iliili i Papa ua pupuni le alava’a ina ia to’a ai le va’a o le Malietoa. Na maua ai le igoa o le Malae o Tau’iliili i Papa o “Niniva ma Punialava’a”. O Tau’iliili i Papa lenei sa fai lana Autaunonofo. O Tau’iliili i Papa fo’i lenei sa fai lana Fa’atotologa Tama. O Tau’iliili i Papa fo’i lenei na maua ai le “Mulivai o Tausala”. E fa ana usuga i tama’ita’i nei: Usuga #1. Tuia’ana Taufau, #2. Fotuiloa, #3. Ga’uimamaia, #4. Sualupe.

Sa nonofo Tau’iliili i Papa ma lana autaunonofo lenei i Vailele ma Fagalii i le itumalo o Vaimauga i Sasa’e. O tama o le Fa’atotologa Tama: Tupuivao, o le tama lea a Taufau. Vaovasamanaia, o le tama lea a Ga’uimamaia. Toilolo, o le tama lea a Sualupe. Na sau fo’i lea i ai ma Sina le uso o Taufau ma lana tama o Faumuina i le fa’atotologa tama lenei. O le Mulivai i le va o Vailele ma Fagalii sa fai ai lenei fa’atotologa tama. O lo’o i ai le vaitafe sa fa’atafe ai tamaiti ma e ta’ua fo’i “O le Vai o Tausala” po’o le “Mulivai o le fa’atotologa tama Tausala”.

O le Mulivai lea sa feviiai ai tama a Tausala. Ona fa’apea atu lea o Sina(Na au lana Uto): Va’ai outou i le totolo o la’u tama, e folifoli tupu. Ae fa’apea ane tama’ita’i, e te iloa i se a? Tali Sina: e iloa i lana totolo. O le tama la lea o Tuia’ana Tuiatua Faumuina e ana le Tupufia. Sa fa’apea atu fo’i Taufau(Na tafea lana Uto): Se ai lava se malosi o si a’u tama pe a ola a’e. Tali atu fo’i tama’ita’i, e te iloa i se a? Ae tali Taufau: E iloa i lana pupula, e toa ma lona tino e malosi. O le tama la lea o Tupuivao, na tafea ai le utu a lona tina o Taufau sa Tuia’ana; ae tu le utu a Sina i lana tama o Faumuina, na avea ma Tuia’ana ina ua tu’umalo Tuia’ana Taufau. Ae fa’apea mai le tama’ita’i o Sualupe: Va’ai outou i si a’u tama, ai lava se loto maulalo. Ona fa’apea ane lea o tama’ita’i, e te iloa i se a? Tali Sualupe: Oute iloa i lana pupula ma lana amio filemu, e fai uso fo’i. O le tama la lea o Toilolo. Sa fai ane fo’i le tama’ita’i o Ga’uimamaia: Va’ai outou isi a’u tama, ai lava se mau ava. Ona fesili fo’i lea o tama’ita’i, e te iloa i se a? Tali Ga’uimamaia: E iloa i ona foliga, lona lalelei ma lona tino e manaia. O le tama la lea o Vaovasamanaia. “Na taunu’u uma lava sa’afiafiaga a tama’ita’i nei ia latou tama”.